25 ийлан – 25 уштыш!

small_kugarnja_logo.jpg21 августышто «Кугарня» газетын 25 ияш лӱмгечыжлан пӧлеклалтше таҥасымаш лийын. Тудым куржталаш йӧратыше-влакын «Айвика» клубышт дене пырля эртарыме. Йошкар-Олаште Ленин лӱмеш тӱвыра полат воктенысе паркыш спортсмен-влак погыненыт ыле. Тыгак тӱвыра полатын администрацийже, «Кугарня» газет редакцийын пашаеҥже да куржталаш толшо-влак верч азапланыше еҥ-влак ыльыч. 25 меҥге да тынарак кужытан эстафетым эрташ 36 легкоатлет лектын. Эстафетыште (тидым эше экиден маныт) кум команде лийын. Кажныштыже - вич еҥ. Кажне спортсмен вич меҥгым эртен. Ты таҥасымаште эн писылан Марий машиностроитель заводын командыжым шотлымо. Тудо 25 меҥгым ик шагатат 51 минутышто эртен. Ӱдырамаш-влак коклаште эн сай результат дене Т.Самойлова куандарен: 25 меҥгым 2 шагатат 3 минутышто куржын. 29 ияш Татьяна Петровна - МарГУ-м тунем пытарыме деч вара Марий радиомеханический техникумышто тренер. Пелашыже, 33 ияш Олег Юрьевич, МВД системыште пашам ышта. Тудат спорт дене кылым куча. 2003 ий годсек ече дене спорт мастер. Кум эргым ончен куштат. Тений Данил 4-ше классыште, Кирилл 3-шо классыште, а Илья 1-ше классыште тунемаш тӱҥалыт. Коктынжо куштылго атлетикылан шӱмаҥыныт гын, изиракышт самбо дене секцийыш коштеш. Кокымшо ден кумшо верлам «Айвика» клубын еҥже-влак: Вера Ягдарова ден Анастасия Зотова - налыныт. Пӧръеҥ-влак коклаште Денис Головин эн писе лийын. Тудат – «Айвика» клубын членже. 5 июньышто «Кугарня» газетын лӱмгечыж вашеш Волжск районышто Мӱшыл ер воктене курыкышто куржталмаште тудак абсолютный чемпион лӱмым сулен ыле. Кокымшо верыш лекше Алексей Матвеев туддеч кок минутлан варашрак финишыш толын. А кумшо верыште – Виталий Воронцов. Тудо Д.Головин деч шым минутлан кодын. Но ончыкыжым сай результатлан ӱшана, вет тудо куштылго атлетике дене спорт мастер да тидланак Йошкар-Олаште йоча-влакым кумылаҥда, спортшколышто пашам ышта да куштылго атлетике федерацийын тренерже. Александр Малеев ден Павел Кузнецов эн самырык участник улыт ыле. Нуно Марий радиомеханический техникумышто тунемыт, автомеханик лияш ямдылалтыт. Спорт дене кылым 50 ий кучышо 71 ияш Вячеслав Талько денат палыме лийна. Тудо сутка мучко куржталмаш да куштылго атлетике дене спорт мастер. Маригражданстройышто апшатлан пашам ыштен. Шке ийготанже-влак коклаште тудо чолгалыкым ончыктен. Чыла сеҥыше-влаклан медальым, «Кугарня» газет редакций деч изирак пӧлекым да таумутан серышым кучыктымо. Газетнан тӱҥ редакторжо Э. Иманаев Виче кундем гыч толшо Павел Михалевым спецприз дене палемдыш. Шке ийготан тӱшкаште сеҥыше-влакат изи пӧлекым нальыч. «Айвика» клуб шотышто ешараш гын, тений тудо 4 ноябрьыште икымше лӱмгечыжым пайремла. «Айвикалан» - 5 ий! Эльвира ТЕРЕНТЬЕВА. И. Речкинын фотожо-влак. kugarnya_run_01 (2).JPGkugarnya_run_00.jpgkugarnya_run_05.jpgkugarnya_run_07.jpgkugarnya_run_08.jpg

Жаплан келшыше

Пайдале ресурс

Официальный портал Республики Марий Эл
Министерство культуры Российской Федерации
Федеральное агентство по делам национальностей (ФАДН)
Комиссия по вопросам информационного сопровождения государственной национальной политики
Федеральная целевая программма "Культура России"
Приволжский федеральный округ Российской Федерации
© 2017, МАРИЙ ЭЛ РЕСПУБЛИКЫН ТӰВЫРА, ПЕЧАТЬ ДА КАЛЫК-ВЛАКЫН ПАШАШТ ШОТЫШТО МИНИСТЕРСТВЫЖЕ
424002, Йошкар-Ола, Кремлёвский урем, пӧрт 41, тел.: +7 (8362) 45-09-63,
Яндекс.Метрика