«Ӱдырсийын» сийже тутло лийын

small_mari_ryder.jpg
Ӱдыр-влакын марлан каяш шумо пагытыштым почын пуышо марий калыкын ожнысо «Ӱдырсий» пайремже 29 октябрьыште Республикысе йоча ден самырык-влак театр-рӱдерыште эртен. Мондаш тӱҥалше йӱлам марий-влак коклаште шарыме сомылым шке ӱмбакыже Республикысе марий тӱвыра рӱдер налын. Тиде пашаш Республикысе йоча да самырык-влак театр-рӱдер да «Саскавий» марий ӱдырамаш-влакын мер ушемже ушненыт да республик кӱкшытан конкурсым эртарен колтымаште шке надырыштым пыштеныт. «Ӱдырсий» конкурсыш тунеммаште да пашаште тале, мер сомылыш куштылгын ушнышо куд ӱдыр ушнен. Тиде – Куженер район Шӱдымарий ялын шочшыжо, Марий кугыжаныш университетын студенткыже Полина Савельева, тиде вузыштак шинчымашым погышо Татарстан кундем Йӱштӧ Памаш ял гыч Анастасия Галиева, Морко район Унчо ял гыч Дарья Иванова, Татарстан кундем Пелемеш ял гыч Любовь Михайлова, Провой кундем Чакмарий села гыч Анастасия Царевогородцева да Марий кугыжаныш университетын студенткыже, Пошкырт велын ӱдыржӧ Лариса Ипулаева. Шочмо кундемыштышт йӱлам эртарыме радамым почын пуаш ӱдыр-влаклан тӱвыра пӧрт пеленсе фольклор ансамбль, йолташышт да родо-тукымышт полшеныт. Ӱдыр-влакын кид-паша, кочкыш йӧрварым ыштен моштымыштым, мурен-куштымо мастарлыкыштым, уш-акылыштым, мотор марий тувырым чиен, сценыште ошкыл моштымо мастарлыкым жюри аклен: Республикысе марий тӱвыра рӱдерын директоржо Наталья Пушкина, Республикысе йоча да самырык-влак театр-рӱдерын художественный вуйлатышыже Олег Иркабаев, культурологий доктор, Марий кугыжаныш университетын преподавательже Галина Шкалина, «Марий Эл Радион» ответственный редакторжо Владимир Матвеев да марий амалкалче Василий Петров. Тыге «Марий йӱлалан чоным пуышо ӱдыр» номинацийыште Дарья Иванова сеҥышыш лектын. «Интернет марий ӱдыр» - тиде Анастасия Галиева. «Мурызо ӱдыр» номинацийыште Анастасия Царегородцева ончыко лектын. «Шыма ӱдыржӧ» кушеч толын, гала? Татарстан кундем Агрыз вел гыч, тиде - Любовь Михайлова! «Лывырге ӱдыр» номинацийыште Лариса Ипулаева ончыко лектын. «Ӱдырсий» конкурсын гран-прижым Полина Савельева налын. Конкурс театр представлений семын эртен. Тудым ик кылдышыш ушымо сомылым оза ден озавате (Марий Эл Республикын калык артистше-влак Игорь Актуганов ден Светлана Строганова), шоҥго ӱдыр (Республикысе марий тӱвыра рӱдерын методистше Галина Ласточкина) чаткан шуктеныт. «Марий памаш» ансамбль, «Чон оҥгыр» фольклор коллектив, мурызо-влак Светлана Яндукова ден Стас Устюгов сылне мурышт да куштымашышт дене пайремым веселан эртараш полшеныт. Республик кӱкшытан мероприятийым эртарен колтымаште икмыняр предприятий, организаций да амалкалче полшен. Тиде – «Саскавий» ӱдырамаш ушем, «Мару» ООО (М.В.Вязова), «Марий хладокомбинат» ОАО (А.Т.Шакиров), «Малахов монча» (Г.С.Бастракова), амалкалче В.Б.Васюков, «Кугарня» ден «Ямде лий» газет редакций-влак (тӱҥ редакторышт Э.А.Иманаев ден Л.В.Семенова). Республикысе тӱвыра рӱдер чылаштлан кугу таум каласа да тазалыкым да эсенлыкым тылана. «Ӱдырсий» конкурсыш ончаш толшо-влакын шонымашышт тыгайрак: Р.И.Николаева (Мардан Рая): Тыгай мероприятий икымше гана эртаралтеш. Моткоч келшыш Морко кундемысе «Унчо ӱжара» фольклор коллективын выступленийже. Ожнысо калык йӱлам мастарын да чын почын пуышт, конкурсышто шке вийжым ончыкташ лекше мотор Дашам кумылын поддержатлышт. Тӱҥалтыш сай, но ончыкыжым тыгай конкурсын акшым кугемдаш да марий йӱлам тӱрлӧ шӧрын гыч почын пуаш манын, консультант-влак лийшаш улыт, шонем. Шанче могырымат, практический ужаш велымат. З.П.Васильева: Мероприятий сай кумылым кодыш. «Ӱдырсийын» сийже тутло ыле. Ожнысо марий йӱлам огына мондо, сцене гоч у тукымлан почын пуымо – тиде сай паша.
Республикысе марий тӱвыра рӱдер medium_ydyrsi1_0.JPGmedium_ydyrsi2_0.JPGmedium_ydyrsi4_0.JPGmedium_ydyrsi5.JPG medium_ydyrsi6_1.JPG

Жаплан келшыше

Пайдале ресурс

Официальный портал Республики Марий Эл
Министерство культуры Российской Федерации
Федеральное агентство по делам национальностей (ФАДН)
Комиссия по вопросам информационного сопровождения государственной национальной политики
Федеральная целевая программма "Культура России"
Приволжский федеральный округ Российской Федерации
© 2017, МАРИЙ ЭЛ РЕСПУБЛИКЫН ТӰВЫРА, ПЕЧАТЬ ДА КАЛЫК-ВЛАКЫН ПАШАШТ ШОТЫШТО МИНИСТЕРСТВЫЖЕ
424002, Йошкар-Ола, Кремлёвский урем, пӧрт 41, тел.: +7 (8362) 45-09-63,
Яндекс.Метрика