Мультфильм марла ойлаш туныкта

small_mari_ryder.jpgОлыкын моторлыкшылан куанен ошкылшо марий ӱдыр Тачана шке таҥаш рвезым вашлиеш. Палыме лийыт: тиде – Юкече, кава гыч мландыш волен. Марла огеш кутыро, а мутланаш тунемаш кумылжо уло. Тыге Тачана Юкечым шке йылмыжлан туныкта. Нунылан пӱртӱсшат куана, Юкечын Кече аважат шокшыжым огеш чамане… Тыгай сюжет дене «Марла ойлаш тунемына» мультфильм тӱҥалеш. Вес кечын ӱдыр ден рвезе угыч вашлийыт. Тачана Юкечым «ача», «ава», «коча», «кова», мут-влакым марла ойлаш, марий буква ден йӱк-влакым чын каласаш туныкта. Рвезе марий ӱдырын полшымо дене марла шотлаш тунемеш. Марий йылме дене профессионал кӱкшытыштӧ ямдылыме мультфильмым эн ончыч олаласе да районласе школлаште марий йылмым туныктышо-влак онченыт да сай акым пуэныт. Тыгак Марий форумын шыже сессийыш марий калык илыман тӱрлӧ кундем гыч толшо делегат-влак тудын нерген «йоча-влакым веле огыл, кугыеҥ-влакымат тиде паша марий йылмым тунемаш кумылаҥда», - манын палемденыт. «Марла ойлаш тунемына» мультфильм – Республикысе марий тӱвыра рӱдерын проектше. Марий Эл Республикын тӱвыра, печать да калык-влакын пашашт шотышто министерстве тудым илышыш шыҥдараш полышым пуэн. Тӱвыра рӱдерын пӧлкажым вуйлатыше Л.И.Кошкина проектлан вуйын шоген, шкеак сценарийым возен. Сӱретче А.И.Голубцев шке сӱретше-влакым «ылыжтарен». Семым самодеятельный композитор С.А.Яндукова келыштарен. Йӱк режиссер С.В.Белов. Мультфильмым Марий Эл Республикын калык артистше Э.С.Лисицына ден А.Эшпай лӱмеш Марий Кугыжаныш филармонийын артистше, О.Ипай лӱмеш премийын лауреатше С.А.Яндукова йӱкаҥденыт. Филологий шанче кандидат З.К.Иванова консультант сомылым шуктен. Марий тӱвыра рӱдер «Марла ойлаш тунемына» вич мультфильмым ямдылен. Тудо икшыве-влакым марий йылме деке кумылаҥда, порылыклан туныкта, икте-весе дене келшен илаш ӱжеш. Йочасад ден школ пашаеҥ-влак тудым методический полыш семын кучылт кертыт. Республикысе марий тӱвыра рӱдер

Жаплан келшыше

Пайдале ресурс

Официальный портал Республики Марий Эл
Министерство культуры Российской Федерации
Федеральное агентство по делам национальностей (ФАДН)
Комиссия по вопросам информационного сопровождения государственной национальной политики
Федеральная целевая программма "Культура России"
Приволжский федеральный округ Российской Федерации
© 2017, МАРИЙ ЭЛ РЕСПУБЛИКЫН ТӰВЫРА, ПЕЧАТЬ ДА КАЛЫК-ВЛАКЫН ПАШАШТ ШОТЫШТО МИНИСТЕРСТВЫЖЕ
424002, Йошкар-Ола, Кремлёвский урем, пӧрт 41, тел.: +7 (8362) 45-09-63,
Яндекс.Метрика