Кугече лӱҥгалтыш

Кугече пайрем годым ожнысек изижге-кугужге лӱҥгалтышыште лӱҥгалтеныт. Калыкын ойжо почеш, Юмынӱдыр мландыш лӱҥгалтыш дене волен, Юмын пытыдыме кӱтужым кӱтен. Чодыраште илыше рвезым вашлийын, йӧратен шынден. Каваш мӧҥгеш пӧртылаш огыл манын, порсын лӱҥгалтышым кавашке колтен. Йӧратыше мужыр деч марий калык шарлен маныт. Юмынӱдыр лӱмеш Кугече кечын лӱҥгалтыште лӱҥгалтеныт. Тыге кава ден мланде коклаште кылым ыштыме. Волжский районын онаеҥже А.А.Федоровын ойлымыж почеш, Кугече лӱҥгалтыште кӱшкӧ-кӱшкӧ нӧлталалтат, Юмын шӱлышым налат, чонет эрыкталтеш, Юмо деке лишемат. Тыгак лӱҥгалтыш дене мыняр кӱшкырак кӱзет, шурно тунар сайын шочеш, маныныт. Мутат уке, кажне кундемыште Кугечым вашлийме да пайремлыме йӱла шкешотан. Тидым шотыш налын, Республикысе марий тӱвыра рӱдер Марий Эл Республикын тӱвыра, печать да калык-влакын пашашт шотышто министерствын полшымыжлан эҥертен, кокымшо гана «Кугече лӱҥгалтыш» республик кӱкшытан конкурсым увертарен. Тудо марий калыкын йӱлажым да тӱвыражым арален да вияҥден колтымаште изи огыл надырым пышта. Лӱҥгалтышым ялыште посна, лумын ончыч шулымо, кӱкшакарак вереш шынденыт. Тыгай верым тӱзатыме да тиде сомылыш верысе калыкым ушымаш, тыгак лӱҥгалтышым ямдылыме да вераҥдыме шотышто паша шыныкым (опытым) шарымаш - конкурсын тӱҥ задачыже. Конкурсыш ушнаш шонышо-влак 1 апрель марте Марий тӱвыра рӱдерыш йодмашым колтышаш улыт. Электрон почтын адресше: mari-centr@mail.ru але (8362) 45-88-51 номерыш факс дене колташ лиеш. 10 гыч 21 апрель марте конкурс пашам жюри аклаш тӱҥалеш. Сеҥыше да призер-влакын лӱмыштым 22 апрельыште Йошкар-Олаште эртаралтше республик кӱкшытан «Кугече» йӱла пайремым палемдыме годым пален налына. 

Жаплан келшыше

Пайдале ресурс

Официальный портал Республики Марий Эл
Министерство культуры Российской Федерации
Федеральное агентство по делам национальностей (ФАДН)
Комиссия по вопросам информационного сопровождения государственной национальной политики
Федеральная целевая программма "Культура России"
Приволжский федеральный округ Российской Федерации
© 2017, МАРИЙ ЭЛ РЕСПУБЛИКЫН ТӰВЫРА, ПЕЧАТЬ ДА КАЛЫК-ВЛАКЫН ПАШАШТ ШОТЫШТО МИНИСТЕРСТВЫЖЕ
424002, Йошкар-Ола, Кремлёвский урем, пӧрт 41, тел.: +7 (8362) 45-09-63,
Яндекс.Метрика