Тӱвыра сомылым пырля шуктымо нерген Марий Эл Республике ден Свердловск область ойпидышым ыштеныт

Тӱвыра сомылым пырля шуктымо нерген Марий Эл Республике ден Свердловск область ойпидышым ыштеныт

Марий форумын шошо сессийже тений 7-8 апрельыште Свердловск кундем Красноуфимск районышто эртен. Тудо Икымше марий погын эртарымылан 100 ий темылан пӧлеклалтын.

Форумыш Марий Эл, Татарстан, Удмурт, Башкортостан республикыла, Киров, Угарман да Свердловск областьла, Пермь кундем гыч мер пашаеҥ, шанчызе, тӱвыра да туныктымо аланыште тыршыше еҥ да журналист-влак погыненыт. Мемнан кундемнан делегацийыжым Марий Эл Республикын Виктер Председательын Икымше алмаштышыже, тӱвыра, печать да калык-влакын пашашт шотышто министр Михаил Васютин вуйлатен.

Эн ончыч уна-влакым Красноуфимск район Юва селан «Марий кудо» этнографий тоштерыштыже вученыт. Пашаеҥ-влак шочмо калыкын йӱлажлан да тӱвыражлан эҥертен пашам ыштымышт нерген каласкаленыт. Верысе «Эрвий» ансамбль шке мастарлыкше да усталыкше дене палдарен.

Тӱвыра министр Юва школыш миен, школ тоштерын пашаже дене палыме лийын. Михаил Зиновьевич пашаче коллективалан сай акым пуэн. Книгагудышто лиймыж годым марий литературын чӱдылыкшым ужын, полшаш сӧрен. А вара Мер каҥашын пленумжо годым Юва школлан икмыняр книгам кучыктен.

Икымше кечын, 7 апрельыште, пленумым почмо да Свердловск кундемыште илыше марий-влакын пашашт нерген доклад-влакым колыштмо. Тыгак тиде кечынак Российысе Марий национально-культурный автономийын конференцийже эртен. Тудын радамышкыже Тюмень областьысе марий-влакын национально-культурный автономийыштым пуртышт. Конференцийыште Российысе Марий национально-культурный автономийын исполкомжым вуйлаташ Марий тӱвыра рӱдерын директоржо Наталья Пушкиналан ӱшаненышт.

Марий Эл Республикын Тӱвыра, печать да калык-влакын пашашт шотышто министерствыже да Свердловск областьын Тӱвыра министерствыже тӱвыра аланыште пырля шуктымо пашам умбакыжат пеҥгыдемдаш манын, чыла калыкын шке тӱвыра поянлыкшым аралыме да вияҥдыме шотышто праважым шотыш налын, кундем-влак кокласе кылын ойыраш лийдыме ужашыжлан шотлен ойпидышым ыштеныт. Келшымашойыш Свердловск областьысе тӱвыра министр Светлана Учайкина ден Марий Эл Республикын тӱвыра, печать да калык-влакын пашашт шотышто министр Михаил Васютин кидпалыштым пыштеныт.

Марий форумын кокымшо кечынже «Урал марий: эртыме корно да тачысе илыш» шанче-практик конференций эртен.

Материалым ямдылаш Эльвира Ендылетова полшен. Фото Денис Речкинын.

Жаплан келшыше

Пайдале ресурс

Официальный портал Республики Марий Эл
Министерство культуры Российской Федерации
Федеральное агентство по делам национальностей (ФАДН)
Комиссия по вопросам информационного сопровождения государственной национальной политики
Федеральная целевая программма "Культура России"
Приволжский федеральный округ Российской Федерации
© 2017, МАРИЙ ЭЛ РЕСПУБЛИКЫН ТӰВЫРА, ПЕЧАТЬ ДА КАЛЫК-ВЛАКЫН ПАШАШТ ШОТЫШТО МИНИСТЕРСТВЫЖЕ
424002, Йошкар-Ола, Кремлёвский урем, пӧрт 41, тел.: +7 (8362) 45-09-63,
Яндекс.Метрика