«Салтак солык» Сеҥымаш Парадыш лектеш

«Салтак солык» Сеҥымаш Парадыш лектеш

Кугу Сеҥымашын 72-шо идалыкше вашеш Республикысе марий тӱвыра рӱдер регион-влак кокласе «Салтак солык» акцийым эртара. Тушко Марий Элыште илыше-влак веле огыл, тений марий калык илыман вес кундем-влакат: Башкортостан, Удмуртий, Татарстан республикыла да Свердловск область гыч тӱрлызӧ-влак ушнат.

Кӧн ача-аваже, коча-коваже, родо-тукымжо але лишыл пошкудыжо Кугу Ачамланде сарыште кредалын, нунын нерген шарнымашым тиде солык гоч у тукымлан кода.

Тиде акцийышке ушнаш гын, тудлан 50х50 кугытан куэмышке салтакын лӱмжым, фамилийжым, ачалӱмжым, сарышке кайыме але толмо, йоммо, колымо жапшым, званийжым да боевой наградыжым тӱрлышаш. Куэмым посна сынаным ойыраш кӱлеш: сареш вуйым пыштышылан - йошкаргым, сареш йомшылан - ошым, сар деч вара колышылан - ошалге-кандым. Куэмже – габардин келшен толеш.

Ямде паша-влакым 3 май марте Марий тӱвыра рӱдерыш кондыман. Варажым нуным иктеш ургат. «Салтак солыкым» 9 майыште, Сеҥымаш Парадыште «Мондалтдыме полк» дене пырля наҥгаят. 22 июньышто, Кугу Ачамланде сар тӱҥалме кечын, Марий Эл Республикысе Т.Евсеев лӱмеш калыкле тоштерысе «Нуно Шочмэл верч кредалыныт» ончерыште ончыкталтыт.

«Салтак солык» акций тений кокымшо гана эртаралтеш. Икымше гана тудо Кугу Сеҥымашын 70 ий темме лӱмеш эртен. Тунам Сеҥымаш Парадыште 23 метр кужытан солыкым самырык ӱдыр-рвезе-влак наҥгаеныт. Кызыт тиде солык Марий Эл Республикысе Т.Евсеев лӱмеш калыкле тоштерыште аралалтеш.

Материалым Раисия Николаева ямдылен.

Жаплан келшыше

Пайдале ресурс

Официальный портал Республики Марий Эл
Министерство культуры Российской Федерации
Федеральное агентство по делам национальностей (ФАДН)
Комиссия по вопросам информационного сопровождения государственной национальной политики
Федеральная целевая программма "Культура России"
Приволжский федеральный округ Российской Федерации
© 2017, МАРИЙ ЭЛ РЕСПУБЛИКЫН ТӰВЫРА, ПЕЧАТЬ ДА КАЛЫК-ВЛАКЫН ПАШАШТ ШОТЫШТО МИНИСТЕРСТВЫЖЕ
424002, Йошкар-Ола, Кремлёвский урем, пӧрт 41, тел.: +7 (8362) 45-09-63,
Яндекс.Метрика