«Калевала» эпохысо финн ӱдырамаш-влакын ассоциацийыштын коло еҥан делегацийже Марий Элыште

«Калевала» эпохысо финн ӱдырамаш-влакын ассоциацийыштын коло еҥан делегацийже Марий Элыште

15-18 августышто «Калевала» эпохысо финн ӱдырамаш-влакын ассоциацийыштын коло еҥан делегацийже Марий Элыште лийын.

Тиде вашлиймаш Финляндийысе ассоциаций ден Марий Элысе «Саскавий» марий ӱдырамаш мер ушемын вуйлатышыштын кутырен келшымышт почеш эртаралтын. «Саскавий» ушем уна-влаклан пеш поян программым ямдылен. Финн ӱдырамаш-влак республикыштына ныл кече веле лийыныт, но тиде кӱчык жапыште нуно марий ӱдырамашын унам порын вашлийше, пашаче, тале кидмастар, мурен-куштен моштышо улмыжым шке шинчашт дене ужыныт.

Делегацийым ассоциацийын председательже Ильдико Лехтинен вуйлатен.Тиде ӱдырамашым финн-угор тӱняште сайын палат. Филологий науко доктор, профессор, М.А.Кастрен обществым ятыр ий вуйлатен, нылле ий наре Финляндийын тӱвыра тоштерыштыже пашам ыштен, кугурак шанче пашаеҥ, вуйлатышын алмаштышыже лийын. Лач Ильдико марий калыкын тӱвыражым, этнографийжым шымлен, ятыр гана Марий мландыш экспедиций дене толын, финн шанчыеҥ-влакланат марий-влак деке корным почын.

18 августышто Йоча тоштерыште эртыше погынымаште Ильдико Лехтинен эрвелмарий-влак деке миен коштмыж нерген лукмо книгажын презентацийжым эртарыш. Марий интеллигенцийым ассоциацийжын историйже да еҥже-влак дене палымым ыштыш. «Тиде ассоциаций 1935 ийыште шочын, да таче ныл тӱжем утла еҥым ушен шога», - мане.

Вашлиймаште финн уна-влаклан йодышымат пуэдышт. Марий мланде нерген могай шарнымашым наҥгаеда манын йодмылан, эн ончыч рӱж вашештыме гай «Монча» маньыч. Марий мландынан пӱртӱсшат нунылан пеш келшен. А тӱҥжӧ марий ӱдырамаш-влакын шке йӱлаштым, йылмыштым, фольклор поянлыкыштым арален илымышт да чылажымат самырык тукымын шӱм-чонышкышт шыҥдарымышт сымыстарен.

 

Анфиса ЭМАНОВА,

«Саскавий» ӱдырамаш ушем вуйверын еҥже

Жаплан келшыше

Пайдале ресурс

Официальный портал Республики Марий Эл
Министерство культуры Российской Федерации
Федеральное агентство по делам национальностей (ФАДН)
Комиссия по вопросам информационного сопровождения государственной национальной политики
Федеральная целевая программма "Культура России"
Приволжский федеральный округ Российской Федерации
© 2017, МАРИЙ ЭЛ РЕСПУБЛИКЫН ТӰВЫРА, ПЕЧАТЬ ДА КАЛЫК-ВЛАКЫН ПАШАШТ ШОТЫШТО МИНИСТЕРСТВЫЖЕ
424002, Йошкар-Ола, Кремлёвский урем, пӧрт 41, тел.: +7 (8362) 45-09-63,
Яндекс.Метрика