Регион-влак кокласе «Угинде» пайрем пагален ӱжеш

Регион-влак кокласе «Угинде» пайрем пагален ӱжеш

«Кинде» уремыште» лийында? А «Шӧр уремыште»?! «Кол уремыште» могай йокмам ужалат  палынеда? Тугеже 21 октябрьыште тыланда  «Шыл урем», «Мӱй урем» дене эрташ веле огыл, тыгак тушко кондымо кочкыш йӧрвар дене  шке ешдам, родо-тукымдам сийлаш йӧн лиеш. Тиде кечын Йошкар-Олашcе Чарла Кремльыште  регион-влак кокласе «Угинде»  пайрем тендам унала ӱжеш.

Регион-влак кокласе «Угинде» пайремым Республикысе марий тӱвыра рӱдер «Российысе марий-влакын калыкле-тӱвыра федерал автономийышт» мер ушем да «Чарла Кремль» информаций да турист рӱдер дене пырля эртара. Марий калыкнан тошто пайремжылан у шӱлышым пуртен,  илышыш шыҥдараш Марий Эл Республикын тӱвыра, печать да калык-влакын пашашт шотышто министерстве да Марий Эл Республикын ялозанлык да кочкыш сату министерстве полышым пуат.

Пайрем эртыме жапыште ялозанлык кочкыш сатум  предприятий, фермер да шке озанлыкым  кучышо-влак ужалаш тӱҥалыт. Ончер-ярминга 9 шагатыште тӱҥалеш, 11 шагатлан республикысе тӱвыра рӱдерын коллективше-влак мастарлыкыштым ончыктат. 12 шагатлан официал ужашыште республикысе онаеҥ-влакын полшымо дене «Угинде» йӱла ончыкталтеш. У пучымышым шолтымо йӱлат эртаралтеш. Тыгак кугыжаныш кучем да мер ушем вуйлатыше-влак калыкым саламлаш толыт, кеҥеж-шыже тургымышто ойыртемалтше ялозанлык пашаеҥ-влак суапландаралтыт.

 «Угинде» пайремлан весела кумылым  республикысе районла да марий-влак илыман регионла гыч фольклор коллектив-влак пуртат. Татарстан, Виче кундемла гыч йодмаш-влак пуреныт. Тыгак пайрем марий конкурс-влаклан поян лиеш: эн ончыч ӧранвочкеш ӱӥым кӧ чумыртышо, торешпила дене пуым пӱчшӧ мужырын лӱмыштым пален налына.

Шыже - пакчасаска лектышым иктешлыме пагыт. Мландым ава семын семалыме  кажне оза, ӧрыктарыше емыж-саскаж дене кугешнен, весе-влакым палдарен кертеш. Тидлан «Шыжын йокмаже» («Дары осени») фотоконкурс полша. Тушко ушнаш Республикысе марий тӱвыра рӱдерын сайтыш (mari-centr@mail.ru) але контактыш (https://vk.com/marityvraryder) фотографийым колтыза.

«Угинде» пайрем годым ожно тӱред налме  у пырче  гыч йоҥыштымо ложаш гыч пыштыме киндым  пелештен посленыт, у пырче гыч пучымышым шолтеныт. Тиде йӱлам теният шукташ тӱҥалына – тӱрлӧ шӱраш гыч келшымаш манме пучымышым шолташ «Угинде» пайремын участникше ден республикыште илыше тӱрлӧ калыкын ӱдыр-эргышт полшат.

Раисия Николаева

 

Жаплан келшыше

Пайдале ресурс

Официальный портал Республики Марий Эл
Министерство культуры Российской Федерации
Федеральное агентство по делам национальностей (ФАДН)
Комиссия по вопросам информационного сопровождения государственной национальной политики
Федеральная целевая программма "Культура России"
Приволжский федеральный округ Российской Федерации
© 2017, МАРИЙ ЭЛ РЕСПУБЛИКЫН ТӰВЫРА, ПЕЧАТЬ ДА КАЛЫК-ВЛАКЫН ПАШАШТ ШОТЫШТО МИНИСТЕРСТВЫЖЕ
424002, Йошкар-Ола, Кремлёвский урем, пӧрт 41, тел.: +7 (8362) 45-09-63,
Яндекс.Метрика