«Ӱдырсий»  калык йӱлан чеченлыкшым почеш

«Ӱдырсий»  калык йӱлан чеченлыкшым почеш

Республикысе марий тӱвыра рӱдер «Ӱдырсий» конкурсым увертарен. Тудо 29 октябрьыште Республикысе йоча да самырык-влаклан театр-рӱдерыште эрташ тӱҥалеш, 16 шагатлан тӱҥалеш. Республик кӱкшытан таҥасымашан тӱвыра мероприятий марий калыкнан йӱлажым аралыме да тудым кушкын толшо самырык тукым коклаште шарыме амал дене эртаралтеш. 

Марий калыкна ожнысек ӱдырын марлан каяш ямде улмыжым  тергымашым эртарен. Тудым шыжым, мланде пашам иктешлымеке, эртареныт. Тидлан ялыште пӧртым ойыреныт, озаж дене кутырен келшеныт. Пайремлан ямдылалтме сомыл шкешотан лийын:  ӱдыр-влак «Ӱдырсийыш» толшо каче-влакым сийлаш лӱмынак пӱрым  шолтеныт,  киндым пыштеныт, пӧлекым ямдыленыт. Тыгай пайремыште ӱдыр ден рвезе палыме лийыныт, варажым ешым погеныт, йочам куштеныт.

Республик кӱкшытан конкурсыш 18 гыч 25 ияш марте ӱдыр-влак ушнен кертыт.  Конкурсыш ушнышо ӱдыр-влак 16 октябрь марте йодмашым электрон адрес дене: mari-centr@mail.ru  але факсыш (836)2  45-88-51 колтышаш улыт.

Конкурс икмыняр тапыр дене эрта. Эн ончыч шкешт, марий калыкнан эртыкше да йӱлаже дене палдарышаш улыт. «Мый марий ӱдыр улам» ой-савыртышым кӱчыкын да рашын почын пуаш тӱҥалыт.

Марий калыкнан  йӱлаже-влак нерген спектакль сынан (театрализованный) модмаш гоч ӱдыр-влак усталыкыштым почын пуат. Тидын годым мондалтше йӱла пайремым ончыктымаш сайрак аклалтеш. Тушто мурат йоҥгалтшаш, куштымашат лийшаш, моло мастарлыкымат почын ончыкташ лиеш.

Марий ӱдыр ожнысек моторлыкым аклен илен, чиемымат шке тукымвожшын, илыме кундемжын але ялжын ойыртемжым пагален ямдылен. Лач тиде ойыртемым «Этномодо» тапыр почын пуа. Конкурсантке-влак калыкнан йӱлажым, эртыкшым кузе палат? Тидлан вашмутым уш-акылым пудыратыше тапыр гоч пален налына.

Ушештарен кодена, ӱдыр-влак 16 октябрь марте  марий вургемым чийыман кум фотографийым Республикысе марий тӱвыра рӱдерыш колтышаш улыт. Нуным  марий тӱвыра рӱдерын официал сайтыш: mari-centr.ru – але  «Марий тӱвыра рӱдер»  группын «вконтакте», «одноклассники» социал кылыш  вераҥдена. 16 гыч  26 октябрь марте интернет-йӱклымаш эртаралтеш. Тушто сеҥыше конкурсантке «Ончышо-влакын симпатийышт» приз дене  палемдалтеш.

Ӱдыр-влак, конкурсыш ушныза, шке вийдам тергыза.

Палемдыман, 2016 ийыште «Ӱдырсий» конкурсыш Марий Эл, Пошкырт да Татарстан кундемла гыч куд ӱдыр ушнен. Гран-прим Куженер район гыч Полина Савельева сеҥен налын.

Раисия Николаева

Жаплан келшыше

Пайдале ресурс

Официальный портал Республики Марий Эл
Министерство культуры Российской Федерации
Федеральное агентство по делам национальностей (ФАДН)
Комиссия по вопросам информационного сопровождения государственной национальной политики
Федеральная целевая программма "Культура России"
Приволжский федеральный округ Российской Федерации
© 2017, МАРИЙ ЭЛ РЕСПУБЛИКЫН ТӰВЫРА, ПЕЧАТЬ ДА КАЛЫК-ВЛАКЫН ПАШАШТ ШОТЫШТО МИНИСТЕРСТВЫЖЕ
424002, Йошкар-Ола, Кремлёвский урем, пӧрт 41, тел.: +7 (8362) 45-09-63,
Яндекс.Метрика