«Угинде» этнофестиваль марий киндын рецептшым рашемда

14 октябрьыште Республикысе марий тӱвыра рӱдер  Чарла Кремль,  «Российысе марий-влак» федерал калыкле-тӱвыра автономий, Марий Эл Республикысе тӱвыра, печать да калык-влакын пашашт шотышто министерстве да ял озанлык да кочкыш шотышто министерстве полшымышт дене «Угинде» регион-влак этнофестивальым эртара.

Марий калыкын шыжымсе йӱла пайремжым Угинде почеш. Тудо ожно еш кумалмаш семын эртен. Ешыште у шурным йоҥыштымо пырче гыч киндым пыштеныт, пучымышым шолтеныт, Ош Кугу Юмылан сай шурным, пакча-саскам поген налмылан тауштеныт, Юмо деч кинде перкем, моло сомылымат икшырымын тӧрлен илаш йодыныт. «Угинде» еш пайремым ятыр марий ешыште кызытат эртарат. Республикысе марий тӱвыра рӱдер тиде йӱлам марий-влак илыман кундемлаште арален да щарен шогымо шотышто кугу сомылым виктарен шога. Тений этнофестиваль регион-влак кӱкшытыштӧ эртаралтеш.

Чарла Кремльыште пайремлан тӱҥалтышым пакча-саскам, шыл-шӧрым, мӱйым да моло йӧрварым ужалыме ярминга ышта. Тушко ялозанлык предприятий, фермер да шке озанлык-влак сатуштым луктыт.

Тӱҥ сценыште пайрем у пучымышым шолтымо йӱла дене почылтеш. Онаеҥ-влакын Юмылан киндым, моло саскам сайын шочыктымылан тауштымо шомакым пелештат, Юмо деч толшо калыклан тазалыкым, перкелыкым йодыт.

«Угинде» пайремлан киндым пыштыме. Могай рецепт почеш тудым ямдылыме? Очыни, кажне ешын шке секретше лийын. Молан манаш гын, киндын кузе оварымыж гычат ешын идалыкым илен лекмыже рашемдалтын. Лач тиде секретым марий кинде конкурс почшаш. Тушко предприятият, посна еҥ-влакат ушнаш кумылыштым почыныт.

Подкогыльым кӧ эн сайын тӱрла – марий кочкышым ыштыме конкурс терга. Посна ойырымо верыште спортым пагалыше-влакым тӱрлӧ модмашке да таҥасымашышке вучат.

Марий калыкын йӱла пайремжым  Марий Элысе шым район, Йошкар-Ола гыч 10 да Виче кундем гыч ик фольклор коллектив сӧрастараш полшат.

Кокымшо ий «Угинде» этнофестиваль вашеш Республикысе марий тӱвыра рӱдер «Шыжын поянлыкше» фотоконкурсым эртара. Таче кече марте (8 октябрь) 16 еҥ деч паша пурен. Нунын коклаште тунемше, тӱрлӧсферыште тыршыше-влак улыт. Сеҥыше-влак Чап танык да шарнымашан пӧлек дене палемдалтыт. Кажне участниклан сертификатым кучыктат.

 

 

Республикысе марий тувыра рудер

Жаплан келшыше

Пайдале ресурс

Официальный портал Республики Марий Эл
Министерство культуры Российской Федерации
Федеральное агентство по делам национальностей (ФАДН)
Комиссия по вопросам информационного сопровождения государственной национальной политики
Федеральная целевая программма "Культура России"
Приволжский федеральный округ Российской Федерации
© 2017, МАРИЙ ЭЛ РЕСПУБЛИКЫН ТӰВЫРА, ПЕЧАТЬ ДА КАЛЫК-ВЛАКЫН ПАШАШТ ШОТЫШТО МИНИСТЕРСТВЫЖЕ
424002, Йошкар-Ола, Кремлёвский урем, пӧрт 41, тел.: +7 (8362) 45-09-63,
Яндекс.Метрика