Виче кундемын марий мурсемже – Йошкар-Олаште

Виче кундемын марий мурсемже – Йошкар-Олаште

«Виче мари» регион кӱкшытан калыкле-тӱвыра автономий Йошкар-Олаште илыше землякышт-влаклан Тӱнямбал ӱдырамаш пайрем кече вашеш чапле пӧлекым ыштен: 7 мартыште «Виче кундемем – шочмо-кушмо верем» концертым конден.

Тушто вич район гыч фольклор коллектив ден посна мурызо-влак шке мастарлыкыштым ончыктеныт. Пайрем мероприятий Марий Эл Республик ден Киров область коклаште тӱвыра да экономик соглашенийым илышыш пуртымо кышкарыште эртаралтын. Ушештарена, соглашенийым 2018 ий вӱдшор тылзын Киров олаште Марий Мер Каҥашын шошымсо сессийже годым пеҥгыдемдыме. Виче кундемыште 10 районышто да Киров олаште 30000 наре марий илат, кугезе коча-коваштын йӱлажым, тӱвыражым да йылмыжым арален кодымаште шке надырыштым пыштат. Куштышо да мурышо марий коллектив-влак регионышто да Россий кӱкшытыштӧ эртыше фестиваль ден конкурслаште шке вийыштым тергат да сеҥыше радамыш логалыт.

Малмыж район Кугу Кетек ял гыч «Шӱдыр» йоча коллектив, Кильмезь кундем гыч «Кульмуж мари» ден «Перелив», Уржум вел «Поса кундем», Пыжанью район гыч марий тӱвыра рӱдерын «Ӱдыр кас», Вятские Поляны ола гыч «Пеледыш» фольклор ансамбль да мурызо-влак Владимир Комиссаров, Елена Афанасьева, Раиса Бушуева шке усталыкыштым сцене гоч почыныт. Кажне номерым зал тич погынышо калык совым кырен вашлийын. Виче кундемеш шочын-кушшо, кызыт марий рӱдолаште илыше Анатолий Зарецких ден Александр Иванов землякышт дене пырля выступатленыт.

«Тыгай вашлиймаш-концертым кок ийлан ик гана эртараш тӱҥалына», – палемден Александр Макаров.

Марий тӱвыра рӱдер

Жаплан келшыше

Пайдале ресурс

Официальный портал Республики Марий Эл
Министерство культуры Российской Федерации
Федеральное агентство по делам национальностей (ФАДН)
Комиссия по вопросам информационного сопровождения государственной национальной политики
Федеральная целевая программма "Культура России"
Приволжский федеральный округ Российской Федерации
© 2017, МАРИЙ ЭЛ РЕСПУБЛИКЫН ТӰВЫРА, ПЕЧАТЬ ДА КАЛЫК-ВЛАКЫН ПАШАШТ ШОТЫШТО МИНИСТЕРСТВЫЖЕ
424002, Йошкар-Ола, Кремлёвский урем, пӧрт 41, тел.: +7 (8362) 45-09-63,
Яндекс.Метрика