«Заря» газетын лекташ тӱҥалмыжлан 85 ий темын

«Заря» газетын лекташ тӱҥалмыжлан 85 ий темын

«Заря» Кужэҥер район газетын лекташ тӱҥалмыжлан 85 ий темме лӱмеш райрӱдыштӧ кугу пайрем мероприятий-влак эртеныт. Кугу вашлиймашыш Йошкар-Ола гыч шерге уна-влак толыныт. Нуным райгазетын тӱҥ редакторжо Н.А.Глушкова ден муниципальный район депутат-влак Погынымашын председательже О.А.Фокина шокшын вашлийыныт, савыктышын эртыме корныж дене кумдан палдареныт.

Уна-влак: Марий Эл Республик Кугыжаныш Погын председательын алмаштышыже, В.М.Васильев лӱмеш МарНИИЯЛИ-н директоржо Е.П.Кузьмин, «Марий книга издательстве» савыктыш пӧртын директоржо, прозаик Ю.И.Соловьев, «Марий национальный конгресс» мер толкын исполкомын председательже, «Кугарня» газетын тӱҥ редакторжо Э.А.Иманаев газетын чумыр колликтившым, ветеран-влакым, савыктышлан полшаш кумылан кажне еҥым вуйлатышыштын возымо саламлымашан серышышт дене палдареныт, шергакан пӧлекым кучыктеныт. Район газетым лудшо-влак лӱм дене «Искра» ялозанлык предприятийын председательже Н.А.Поликарпов ойлен, журналист-влаклан шуко поро тыланымашым каласен.

Ты мероприятий радамыште шӱлыкан, но тыгодымак кумылым савырыше лаштыкат лийын. Ныл ий утларак ончыч, 2016 ий 12 январьыште, ты газетын тӱҥ редакторжылан 33 ий ыштен, шуко чаплӱмым налын, илыш дене вучыдымын чеверласыше курыкмарий писатель Виталий Альбертович Петуховын илыме пӧрт пырдыжеш Шарнымаш оҥам почмо церемонийыш райрӱдыштӧ, лишыл яллаште илыше калык шуко погынен ыле. Ты татым кужу жаплан шарнаш кодыктен шерге уна-влак Е.П.Кузьмин, Ю.И.Соловьев, Э.А.Иманаев, тыгак О.А.Фокина, Н.А.Глушкова, газет пашан ветеранже Л.И.Бирюкова, Виталий Альбертовичын пелашыже В.В.Петухова калык писательым, еш озам да вуйлатышым поро мут дене шарналтен ойленыт.

Кужэҥер поселкышто тыгай шарныктыш оҥа – икымше. Тудым пӧрт пырдыжеш вераҥдаш «Марий национальный конгресс» мер толкын шке исполкомжын паша радамыштыже пеҥгыдемден да илышыш пуртен.

Ю.Косатан,
Б.Редькин

Жаплан келшыше

Пайдале ресурс

Официальный портал Республики Марий Эл
Министерство культуры Российской Федерации
Федеральное агентство по делам национальностей (ФАДН)
Комиссия по вопросам информационного сопровождения государственной национальной политики
Федеральная целевая программма "Культура России"
Приволжский федеральный округ Российской Федерации
© 2017, МАРИЙ ЭЛ РЕСПУБЛИКЫН ТӰВЫРА, ПЕЧАТЬ ДА КАЛЫК-ВЛАКЫН ПАШАШТ ШОТЫШТО МИНИСТЕРСТВЫЖЕ
424002, Йошкар-Ола, Кремлёвский урем, пӧрт 41, тел.: +7 (8362) 45-09-63,
Яндекс.Метрика