Москваште – Марий Элын кечыже-влак

Марий Элым вуйлатыше Александр Евстифеевын тӱҥалтышыж почеш, Марий автономийлан 100 теммым палемдыме кышкарыште Москваште Марий Эл Республикын кечыже-влак эртат.

23 октябрьыште Кугыжаныш Кремльын Дворецыштыже торжественный мероприятий лиеш, тудын тӱҥ ужашыже – кундемнан ик эн ончыл профессионал коллектив-влакын концертышт.

Марий Эл Правительстве пӧртыштӧ тиде кугу пайремлан пӧлеклалтше икымше заседаний лийын. Тудым Правительстве председательын икымше алмаштышыже Михаил Васютин эртарен.

Мероприятийын программыже тыгай ужаш-влаклан шелалтеш: «Марий мланде – Российын шӱм-чоным савырыше вийже!» ончер да торжественный концерт. «Ямдылалташ жап уло, туге гынат сайын да ончылгоч палемдыме радам дене эртараш манын, чылажымат ыштен шуктыман», – каласен Михаил Васютин.

Марий Эл Тӱвыра, савыктыш да калык паша шотышто министр Константин Иванов увертарен: концертым Эрик Сапаев лӱмеш опер да балет кугыжаныш академический да М.Шкетан лӱмеш Марий национальный драме театр-влакын, Яков Эшпай лӱмеш Марий кугыжаныш филармонийын, республикысе Палантай лӱмеш тӱвыра да сымыктыш колледжын талантан еҥже да Курыкмарий районысо кӱслезе-влак сӧрастараш тӱҥалыт.

«Концерт программе ныл ужашан. Чумыр налмаште нуно Марий кундемын эртыме корныжым почын пуат. Кажне ужашыште – куштымаш, мурымаш да семӱзгарым шоктымаш. Тидын деч посна Марий Эллан 100 ий теммылан пӧлеклалтше фильмым ончыкташ палемденна», – каласен Константин Иванов.

Т.Евсеев лӱмеш Национальный тоштерым вуйлатыше Светлана Зверева погынышо-влакым мероприятийын ончер ужашыже дене палдарен. Экспозиций-шамычым тематике почеш икмыняр блоклан шелыт. Нуно кундемнан историйже, пӱртӱсшӧ, туризмже, профессионал усталык да искусство аланже, образований сферыже, спорт тӱняж дене кылдалтше лийыт. Посна стенд – «Марий Элыште ыштыме!» брендан – агропромышленный комплекслан пӧлеклалтеш.

Светлана Звереван ойлымыж почеш, кызыт тӱрлӧ наглядный материалым вераҥдыме шотышто темлымашым каҥашат. Мутлан, тиде – Марий Элын сылне верже дене кылдалтше макет але тотем животный-влакын фигурышт, кызытсе жаплан келшыше тӱрлӧ инсталляций, кундемнан панорамыже. «Видеомат кучылташ тӱҥалына, кумылан-влаклан ончерыште экскурсийым эртарена», – каласен тоштерым вуйлатыше.

Мучашлан Марий Эл Правительстве председательын икымше алмаштышыже мероприятийлан вуйын шогышо еҥ-влаклан докладым, презентацийым да моло пашам ончыкташ кӱштен.

Пайремыш билетым Кугыжаныш Кремль Дворецын сайтышкыже пурен налаш кызытат лиеш. 

Марий Эл Республик вуйлатышын организаций да аналитике виктемжын уверже негызеш Г.Кожевникова ямдылен.

Жаплан келшыше

Пайдале ресурс

Официальный портал Республики Марий Эл
Министерство культуры Российской Федерации
Федеральное агентство по делам национальностей (ФАДН)
Комиссия по вопросам информационного сопровождения государственной национальной политики
Федеральная целевая программма "Культура России"
Приволжский федеральный округ Российской Федерации
© 2017, МАРИЙ ЭЛ РЕСПУБЛИКЫН ТӰВЫРА, ПЕЧАТЬ ДА КАЛЫК-ВЛАКЫН ПАШАШТ ШОТЫШТО МИНИСТЕРСТВЫЖЕ
424002, Йошкар-Ола, Кремлёвский урем, пӧрт 41, тел.: +7 (8362) 45-09-63,
Яндекс.Метрика